🎯 *यशवंत - एक प्रेरणास्रोत*
🎯 *एक भारावलेला दिवस....*
🎯 *श्री.संदीप पाटील,दुधगाव. 9096320023.*
काल शाळेत एक असा प्रसंग घडला, ज्याने माझं मन अगदी भरून आलं. शिक्षक म्हणून काम करताना आपण रोज मुलांसाठी काही ना काही धडपड करत असतो; पण त्या धडपडीचं एवढं सुंदर आणि अनपेक्षित फळ मिळेल, याचा विचारही मी केला नव्हता.
काल शाळेत येलूरचे (ता. वाळवा) गायकवाड दांपत्य आले होते. नुकताच मला जो 'तालुकास्तरीय आदर्श शिक्षक पुरस्कार' मिळाला, त्याबद्दल माझा सत्कार करण्यासाठी ते आवर्जून आले होते. तसं पाहिलं तर त्यांची आणि माझी प्रत्यक्ष भेटण्याची ही केवळ दुसरीच वेळ. पण आमच्यातला स्नेह आणि संवाद 'यशवंत प्रश्नमाले'च्या माध्यमातून गेल्या वर्षभरापासून घट्ट जोडला गेला आहे.
त्यांनी बोलता बोलता त्यांच्या नातीचं कौतुक सांगितलं. ती चिमुकली यंदा दुसरीत गेली आहे. पण पहिलीत असतानाच तिने 'गुणवत्ता शोध परीक्षा' आणि इतर अनेक खाजगी परीक्षांमध्ये चक्क जिल्हा आणि राज्य स्तरावर घवघवीत यश मिळवलं. हे ऐकून मला साहजिकच खूप आनंद झाला. पण पुढच्या क्षणी ते जे म्हणाले, त्याने मी खऱ्या अर्थाने निशब्द झालो, भारावून गेलो. "सर, आमच्या नातीच्या या यशामध्ये तुमच्या 'यशवंत प्रश्नमाला' या उपक्रमाचा खूप मोलाचा वाटा आहे," असे उद्गार त्यांनी काढले.
ते शब्द ऐकताना माझ्या मनात एक वेगळीच कृतज्ञतेची भावना दाटून आली. एक शिक्षक म्हणून आपण जे काही पेरतो, ते असं कुठेतरी रुजतंय आणि बहरतंय, हे ऐकण्यासारखं दुसरं सुख जगात नाही. प्रशासनाने दिलेला 'आदर्श शिक्षक पुरस्कार' नक्कीच खूप मोठा आणि सन्मानाचा आहे; पण एका आजी-आजोबांनी आपल्या नातीच्या यशाचं श्रेय जेव्हा माझ्या छोट्याशा प्रयत्नांना दिलं, तेव्हा मला माझा खऱ्या अर्थाने सर्वात मोठा सत्कार झाल्यासारखं वाटलं.
'यशवंत प्रश्नमाला' सुरू करताना जो उद्देश मनात होता, तो आज सार्थकी लागला आहे. गायकवाड दांपत्याच्या त्या मायेच्या शब्दांनी आणि त्यांच्या साधेपणाने मला पुढच्या प्रवासासाठी एक नवी आणि खूप मोठी ऊर्जा दिली आहे
. धन्यवाद...!
